महाराष्ट्रमा जहाज दुर्घटना : उपमुख्यमन्त्री अजित पवारसहित ४ जनाको निधन

महाराष्ट्रमा जहाज दुर्घटना : उपमुख्यमन्त्री अजित पवारसहित ४ जनाको निधन
मुम्बई । भारतको महाराष्ट्र राज्यमा भएको एक दुखद जहाज दुर्घटनामा महाराष्ट्रका उपमुख्यमन्त्री अजित पवारसहित ४ जनाको ज्यान गएको छ। बुधबार बिहान बारामती नजिकै भएको उक्त दुर्घटनाले भारतभर शोकको वातावरण सिर्जना गरेको छ।
प्रारम्भिक जानकारीअनुसार उपमुख्यमन्त्री अजित पवार सवार निजी (चार्टर्ड) जहाज अवतरणको क्रममा दुर्घटनाग्रस्त भएको हो। जहाज बारामती विमानस्थलमा अवतरण गर्ने प्रयासमा रहँदा अचानक नियन्त्रण गुमाएर जमिनमा खसेको बताइएको छ। दुर्घटनापछि जहाजमा आगलागी भएको थियो, जसका कारण सबै यात्रुको घटनास्थलमै मृत्यु भएको पुष्टि गरिएको छ।
दुर्घटनाको जानकारी पाउनासाथ उद्धार टोली, दमकल र सुरक्षा निकाय घटनास्थलमा खटिएका थिए। तर दुर्घटनाको तीव्रता अत्यधिक भएकाले कसैलाई पनि जीवित उद्धार गर्न सकिएन। जहाजमा रहेका अन्य तीन जना को थिए भन्ने विषयमा आधिकारिक विवरण आउन बाँकी रहेको छ।
राजनीतिक वृत्तमा शोक
अजित पवार महाराष्ट्रको राजनीतिमा प्रभावशाली व्यक्तित्वका रूपमा चिनिन्थे। लामो समयदेखि राज्यको नेतृत्वमा सक्रिय रहँदै आएका पवारको आकस्मिक निधनले राजनीतिक क्षेत्र स्तब्ध बनेको छ। भारतीय प्रधानमन्त्री, विभिन्न राज्यका मुख्यमन्त्री तथा राजनीतिक दलका नेताहरूले गहिरो दुःख व्यक्त गर्दै श्रद्धाञ्जली अर्पण गरेका छन्।
महाराष्ट्र सरकारले पवारको सम्मानमा राज्यभर शोक दिवस घोषणा गर्ने तयारी गरिरहेको भारतीय सञ्चारमाध्यमहरूले जनाएका छन्।