प्रधानमन्त्री सुशीला कार्की पदत्यागको तयारीमा, बालेन शाहले शुक्रबार शपथ लिने सम्भावना
By आगो संवाददाता
१० चैत, काठमाडौं । प्रधानमन्त्री सुशीला कार्कीले राजकीय जिम्मेवारीबाट अलग हुने तयारी गरेकी छिन् । शुक्रबार प्रस्तावित प्रधानमन्त्री बालेन शाहले प्रधानमन्त्रीको नियुक्ति लिने र सोही दिन शपथ ग्रहण गर्ने तयारी रहेको स्रोतले जनाएको छ ।
जिम्मेवारी छाड्न केही दिन मात्रै बाँकी रहेको अवस्थामा प्रधानमन्त्री कार्कीले प्रधानमन्त्री तथा मन्त्रिपरिषद्को कार्यालयबाट आफ्नो सक्रिय भूमिका क्रमशः घटाउँदै लगेकी छन् । स्रोतका अनुसार, उनले महत्वपूर्ण प्रशासनिक निर्णयहरू नयाँ नेतृत्वलाई सहज हस्तान्तरण हुने गरी सीमित गरिसकेकी छन् ।
राजनीतिक वृत्तमा भने नयाँ नेतृत्वको आगमनलाई लिएर विभिन्न टिप्पणीहरू भइरहेका छन् । बालेन शाहको सम्भावित नेतृत्वलाई लिएर युवापुस्तामा उत्साह देखिएको छ भने परम्परागत राजनीतिक दलहरूमा मिश्रित प्रतिक्रिया देखिएको छ । स्वतन्त्र छविका कारण चर्चित शाहले शासन सञ्चालनमा नयाँ शैली र पारदर्शिता ल्याउने अपेक्षा गरिएको छ ।
यसैबीच, सत्ता हस्तान्तरणको प्रक्रिया सहज बनाउन उच्चस्तरीय तयारी भइरहेको बताइएको छ । शपथ ग्रहण कार्यक्रम राष्ट्रपतिभवनमा सम्पन्न हुने र त्यसलगत्तै नयाँ मन्त्रिपरिषद् गठन प्रक्रिया अघि बढ्ने अनुमान गरिएको छ ।
प्रधानमन्त्री कार्कीले आफ्नो कार्यकालको अन्त्यतिर देशको राजनीतिक स्थायित्व, प्रशासनिक सुधार र सुशासनका क्षेत्रमा काम गरेको दाबी गर्दै शान्तिपूर्ण सत्ता हस्तान्तरण लोकतान्त्रिक अभ्यासको महत्वपूर्ण उदाहरण हुने बताएकी छन् ।
यो खबर पढेर तपाईंलाई कस्तो महसुस भयो?
प्रतिक्रिया